She'rlar
YO'QLIK SAHROSI
Mastura Abduraim
2026-yil 14-mart
1 daqiqa o'qish1ko'rish0 yoqtirish0 izoh
#adabiyot#o'zlik
Эсладим -
Қуриган дарёлар оқди.
Гулнинг соясидан эврилди булбул.
Шудринг томчисида -
Болалик боқди.
Пойимда ястанди таниш сўқмоқ йўл.
Эсладим -
Юз йиллик ҳислар тўлғониб,
Қизғиш қиёфани чизди
Рассом уфқ.
Баҳор куртаклари эснаб уйғониб
Қишнинг чилласида ғунча ёйди жуфт.
Эсладим -
Ҳазонбоғ, шитирлар қадам
Туман буруқситиб
Чекар ўриндиқ.
Ҳазонлар шивирлаб тутар соябон,
Ёмғир томчисидан туғилади ишқ.
Эсладим -
Кафтини тутиб юракка
Жунжикиб исинди музлаган ҳислар.
Эслансак мавжудмиз,
Бўлмаса яккаш
Йўқлик саҳросига сингмасдан -
Эсланг!