ОНАМНИНГ ДУНЁСИ

 (Mansura)

Онамнинг дунёсида қора бўёқнинг ўзи йўқ...

Яшиллик, беғуборлик, самимийлик ва ўпкани тўлдириб чуқуур нафас олиб,

Капалаклар каби бир кунлик умринга ҳам рози бўлиб,

Булбулдек чах-чах уриб,

Бургут каби вазмин ва эркин парвоз этиб,

Гўёки, Шишкиннинг баҳаво ўрмонларидаги айиқваччалардек она атрофида ўйноқлаб;

Тириклик нафаси уфуриб, қулочларини ёйиб, "Кел, меҳр қучоғи қандай бўлишини ўргатаман!"- деб турган баҳайбат дарахтларидек шамолларда чайқалиб;

Бепаён далаларда ястаниб ётган, рангин, бахтиёр, гўзал гулларидек қуёшга талпиниб;

Тошдан-тошга урилиб оқаётган булоқ сувларидек, тириклик, софлик, покизалик улашиб,

Пурвиқор тоғларидек юксак - яхшилик, сабр-матонат, виждон, ор-номус байроғини ҳаёт чўққисига ўрнатганингча бошингни тик кўтариб истиқомат этишинг мумкин бу оламда!

Онамнинг дунёсида ёмон деган сўзнинг ўзи йўқ -

Барча бирдек яхши - бизнинг оламимизда яшовчи аблахлар ҳам яхши инсон эканлигини ҳали ўзи англаб етолмаган,

йўлини кўрсатиб юборса тўғри йўлга тушиб кетадиган,

ҳаёт зарбаларидан озгина ҳафа бўлган яхшилар деб аталади, эвоҳ!

Бу оламга кирсанг -

Ҳасадгўйлик, кибру-ҳаво, разиллик, душманлик, ёлғон, фисқу-фасод ваҳакозо тугатиб бўлмайдиган иллатларимизни қидирма, тополмайсан!

Онамнинг дунёсида - баҳор қуёши чарақлайди,

Тунларида зулмат йўқ, юлдузлари пастлаб қалбни ёритгай!

Илиқ ва ёқимли ёмғирлари ҳам оппоқ булутлардан тўкилгай - "Тулки болалайди" ҳар куни.

Ишон, камалакка арқон солиб қийқириб ҳалинчак учишинг,

Паға булутлардан музқаймоқ тайёрлаб болаларга улашишинг мумкин бу оламда!

Онамнинг оламида -

Вивалдини "Баҳор"и қулоққа чалиниб турар,

Бахт ноталари сочилиб турар скрипка куйининг бармоқларидан

Мусиқа сеҳрли таёқчасида яхши инсонга айлантирар барчани бирдай,

Олам гўзаллашиб кетар

Одамлар инсонлашиб кетар

Урушлар эриб битиб тинчлик-фаровонликка айлангай

Болалар ўлмагай

Дунё ўлмагай

Одамзод яшай бошлар Одам Атодай

Фаришталар заминга қўниб шайтонни олиб кетар авлоди билан

Шу билан жаҳаннам ҳам ёпилар муқим шайтонлари билан

Бизга Жаннатни ҳозирлашар гулу-чечаклари, сархуш ифорлари билан

Агарда бизнинг дунёмиз ҳам Онагинам оламидек бўла олганида борми...?!

Ва бу оламда яшай олганимизда борми...?!

Янаям билмадим...

Қайдам...